اعلان بالهيدر

الكوسة وبابا غنوج .. ياولاد اللعيبة


طلب مني الكثير من قرائي الأعزاء بأن انوَّع كتاباتي ما بين العامية والفصحى قلت لنفسي ومالو نكتب بالعامية مرة ومرة علشان الناس اللي بتحب الفصحى متزعلش، المهم ندخل بقى في صلب الموضوع اللي هتكلم فيه مباشرة من غير لف ودوران لأن اللف بيتعب الصحة.

طبعا أنا فرحان جدا علشان التجربة الديمقراطية والفرح الشعبي الكبير اللي بتعشوا مصر اليومين دول .. لأننا مجربناش ده من زمااااااااااااااان وحتى لما جربناه في 2005 لما كان ايمن نور منافس قوي للمخلوع .. كانت منظر كدا يعني بنغزي العين وخلاص بالصلى على النبي.

بس التجربة دي ناقصها تنظيم كتيرا قوي فمثلا في سفارتنا في الكويت يقولك لازم يكون معاك بطاقة الرقم القومي المصري او صورتها او الجواز الجديد المميكن .. وغير كدا مش هتنتخب ياعم الحج... بطاقة الرقم القومي هعمل بيها ايه في بلد غير بلدي طيب ما البلد اللي انا فيها بتديني هوية وكمان انا معايا الجواز يقولك معرفش.

طيب خلصنا من النقطة دي .. ندخل النقطة التانية .. واسف ياجماعة لو في كلمات خارجة أوداخلة علشان الباب كان مفتوح وهما حبوا يتمشوا شوية .

يقولك الجواز لازم يكون الجواز الجديد المميكن ..ياعم والجواز القديم مالوا دا حتى صالح لغاية 2015 يقولك لأ لازم الجديد علشان الرقم القومي متسجل فيه طيب اقولك انا الرقم القومي وانت اتأكد اني متسجل في اللجنة العليا للإنتخابات ولا لأ.. يقولك مينفعش طيب ياعم نعمل ايه علشان ننتخب انتوا بتحاصرونا ليه علشان توجهوا الاصوات لحد معين ولا ايه الحكاية عيب كدا.

طيب ياعم انا عاوز اقابل الكبير هنا يقولك ياعم دي قوانين اللجنة العليا يادي اللجنة وسنينها .

الحاجة التالتة بقى والكارثة الكبرى اللي قرفتني قوي قوي قوي إن واحد صاحبي راح ينتخب لقي حد منتخب له وموقع كمان في خانة التوقيع يا حلاوة وكاتب كل البيانات طبعا زميلي اتشال واتهبد وازاي يحصل كدا ومين اللي انتخبلي وياترى انتخب مين ... مصيبة يكون انتخب حد من الفلول.

المهم عمل محضر بالمصيبة دي ومات الموضوع وشبع موت.

وواحد تاني زميلي بردوا دخل ينتخب ومعاه صورة بطاقة الرقم القومي والجواز قالولوا لأ ياعم الحج لازم البطاقة ياعم انا سمعت ان الناس بتنتخب بصورة الرقم القومي .. ياعم اللي قالك كدا بيضحك عليك ومشي صاحبي ومنتخبش.

بعدها سمع انهم بيخلوا الناس تنتخب بصورة البطاقة راح هناك وقعد يزعق ويقول يا حرمية يا فلول يا نصابين وأحنا طبعا مقصرناش صورناه وعملنا معاه تقرير تليفزيوني .. وبردوا الموضوع مات بس مشبعش موت.

والسؤال هنا بقى اذا كنتوا قرفتوا اهلنا بلازم البطاقة والجواز الجديد فإزاي وليه حد ينتخب مكان حد ولا الكوسة وبابا غنوج لسه موجودين ... ياولاد اللعيبة.

وفي حاجة رابعة وهي بقى سوء التنظيم اربعة بس في السفارة هما اللي بيدققوا في اوراق الناس اربعة بس على عدد هائل من المصريين .. ما السفارة مليانة موظفين خليهم عشرة يدققوا ويتحققوا.. ياعم انا تعبت كفاية كدا يمكن علشان دي اول تجرية حصلت اللخبطة دي كلها .. طيب ربنا يرزقنا برئيس محترم يكون رجل دولة ويبعدنا عن الفلول يارب أنت عالم بحالنا.

هناك تعليق واحد

bahia kelany يقول...

ربك يستر الواحد خايف واعتقد اننا نصعد الي الهاوية