اعلان بالهيدر

ياســر أبو الريـش يكتب : اعـمـل عـبيـط


لما تلاقي تكلفة الدعاية لاعلانات جمع التبرعات تخطت ال90 مليون جنيه وتكلفة انتاج مسلسلات وبرامج مقالب تخطت 2 مليار جنيه.. ويقولك مفيش.. يبقي لازم تعمل عبيط

لما يكون عندك مصانع للانتاج الحربي ممكن تصنعلك أم الحنة وتستورد 700 عربة قطار من المجر بقيمة 900 مليون يورو ...في حين أن تكلفتها في مصانع الانتاج الحربي ستكون اقل وستفتح امام المصانع المصرية بابا جديدا..يبقي لازم تعمل عبيط

لما تكون مصر واقعة بين بحرين المتوسط والأحمر ولديها  اكثر من 7 بحيرات طبيعية غير البحيرات المرة واكبر بحيرة صناعية في العالم وهي بحيرة ناصر التي يبلغ طولها 500كم وعرضها 35كم وبعمق 180كم وبحيرة محمية وادي الريان ومع ذلك تستورد سمك مجمد بأكثر من 500 مليون دولار سنويا ..وتعتبر من اكثر الدول استيرادا له.. يبقي لازم تعمل عبيط.

لما تلاقي مصر كانت بتبيع الغاز لاسرائيل بأقل من ربع تمنه العالمي حيث كانت تصدره باسعار تتراوح بين 70 سنتا و1.5 دولار في حين أن سعر التكلفة كان 2.65دولار..ودلوقتي هتستورده منها بالسعر العالمي بدون تخفيض.. مع ان الغاز ده من منطقة آبار البحر المتوسط التي تنازلت عنها مصر لقبرص واسرائيل وتبلغ قيمتها 200 مليار دولار يبقي لازم تعمل عبيط.

لما يبقي عندك مصانع في بورسعيد والاسماعيلية والاسكندرية وبعض المناطق الصناعية في المحافظات.. بيديروها هنود واغلب عمالها هنود وبنغال وكوريين في حين شباب مصر متلطم في الخارج يبقي لازم تعمل عبيط

لما تعرف ان مصر بطل العالم في استيراد القمح من الخارج حيث تصل فاتورة استيراد القمح كل ثلاث شهور الي 4 مليارات جنيه اي ما يعادل 16 مليار جنيه سنويا والرقم قابل للزيادة، وتستهلك ما يعادل 14 مليون طن سنويا .. وعندك رقعة زراعية جيدة..بالاضافة الي ان لديك اتفاقية الحريات الأربع مع السودان لزراعة اراضيه بدون تملك.. يبقي لارم تعمل عبيط

لما تفشل وزارة الزراعة في تسويق القطن المصري محليا وخارجيا، وترفع الدعم عنه، بالاضافة الي منع الفلاح من زراعة القطن قصير التيلة الذي تقوم عليه صناعة المنسوجات في مصر، وعدد من مصانع الغزل تقفل ابوابها.. وتبدأ مصر في استيراد الملابس بطريقة غشيمة.. يبقي لازم تعمل عبيط.

لما تعرف ان ترتيب مصر في مؤشر المنافسة امام المنتج الأجنبي هو 141 وان اي منتج بيتصدر لازم يكون فيه 10% خام اسرائيلي تطبيقا لاتفاقية الكويز ..يبقي لازم تعمل عبيط

لما تعرف ان ترتيب مصر في البحث العلمي هو 127 في حين أن الكيان الصهيوني هو الأول في العالم في هذا الأمر، في حين تحتل المركز 120 في الابتكارات والاختراعات بينما يحتل الكيان الصهيوني المركز الثاني عالميا..يبقي لازم تعمل عبيط.

لما تعرف أن 20% من المواطنين يستحوذون علي 44% من الدخل القومي ولما تعرف ان مصر فيها 21مليون فقير ضمن فئة الفقر المدقع يعني مطحونين و36 مليون يقل دخلهم اليومي عن دولارين يبقي لازم تعمل عبيط

لما تعرف أن مصر في المركز 159 في مؤشر حرية الصحافة من بين 180 دولة، وفي المركز الأخير في جودة ادارة التعليم الاساسي، يبقي لازم تعمل عبيط.

لما تعرف أن مصر احتلت مركز زفت في مؤشر ترجيح معايير غير الكفاءة مثل المحسوبية والواسطة والقرابة في تولي المناصب الكبري هتعرف ليه العلماء بيهاجروا من مصر ..ولازم تعمل عبيط

انا بقولك اعمل عبيط علشان تريح نفسك..لأنه زي ما سعد زغلول قال مفيش فايدة، لأن مصر مازالت تفتقد إلي الضمائر التي تمكنها من التقدم والنهوض من كبوتها..فمتتعبش نفسك واعمل عبيط ومش واخد بالك..وريح دماغك.

وقفة:
قال د.مصطفى محمود… ليس عيبا أن نكون فقراء ..ولكنها جريمة أن نكون متخلفين

**ياسر أبوالريش
**كاتب وباحث سياسي

هناك تعليق واحد

مصطفى عبده يقول...

مش قادر تعمل حاجه غبر السكوت يبقى اعمل عبيط